Бакалавриат – жоғары білім берудің алғашқы деңгейі.

Қазақ ұлттық су шаруашылығы және ирригация университетінде су шаруашылығы, ирригация, гидрология, экология, құрылыс, энергетика, табиғи ресурстар және басқа да сұранысқа ие бағыттар бойынша білім беру бағдарламалары іске асырылады.

Орта білім негізінде оқуға түскен талапкерлер үшін оқу мерзімі – 4 жыл. Техникалық және кәсіптік білім беру ұйымдарын (колледждерді) бітірген талапкерлер үшін оқу мерзімі білім беру бағдарламасына және қайта есептелетін пәндерге байланысты қысқартылуы мүмкін.

Бакалавр дәрежесін алу үшін студент кемінде 240 академиялық кредитті меңгеруі тиіс. Оқыту мемлекеттік, орыс және ағылшын тілдерінде жүзеге асырылады. Бірқатар білім беру бағдарламаларында көптілді білім беру элементтері қарастырылған.

Оқу күндізгі форматта жүргізіледі. Жекелеген пәндер бойынша заманауи цифрлық білім беру технологиялары қолданылады. Оқу жылы екі академиялық семестрден тұрады. Әр семестр 15 оқу аптасын және қорытынды емтихан кезеңін қамтиды. Студенттерге қысқы және жазғы демалыс беріледі.

Оқу барысында студенттер оқу, өндірістік және кәсіби практикалардан өтеді. Студенттер жеке білім беру траекториясын қалыптастыруға, элективті пәндерді таңдауға, ғылыми-зерттеу жобаларына қатысуға және жетекші ғалымдар мен сала сарапшыларының жетекшілігімен жұмыс істеуге мүмкіндік алады.

Үлгерімі жоғары студенттер академиялық ұтқырлық бағдарламаларына қатысып, Қазақстанның және шетелдің жетекші жоғары оқу орындарында білім ала алады. Университет Венгрия, Қытай, Швеция және басқа да мемлекеттердің университеттерімен белсенді ынтымақтастық орнатқан.

Оқудың қорытынды кезеңінде студенттер қорытынды аттестаттаудан өтеді. Білім беру бағдарламасын табысты меңгерген түлектерге «бакалавр» академиялық дәрежесі беріледі. Бакалавр дәрежесі кәсіби қызметпен айналысуға, сондай-ақ магистратурада білім алуды жалғастыруға құқық береді.