Қазақ ұлттық су шаруашылығы және ирригация университеті (ҚазҰСШИУ) — Тараз қаласындағы бұрынғы гидромелиорация және құрылыс институтын қайта құру мақсатында Қазақстан Республикасы Президентінің шешімімен 2024 жылы құрылған жаңа мамандандырылған зерттеу университеті. Университет М.Х. Дулати атындағы Тараз өңірлік университетінің бөлінуі нәтижесінде құрылды.
ҚазҰСШИУ — 1962 жылы негізі қаланған Жамбыл гидромелиорация және құрылыс институтының мұрагері. Бұл институт ондаған жылдар бойы су ресурстары, мелиорация, құрылыс және энергетика салаларында инженер мамандарын даярлайтын негізгі білім беру орталығы болды. Оның түлектері суару жүйелерін, гидротехникалық құрылыстарды және су шаруашылығы саласындағы басқа да стратегиялық нысандарды жобалау мен пайдалануға елеулі үлес қосты.
Ұлттық инженерлік білім беру дәстүрлеріне сүйене отырып, ҚазҰСШИУ өз академиялық бағдарламаларына заманауи технологиялар мен инновациялық тәсілдерді белсенді түрде енгізуде. Университет су ресурстарын тиімді басқаруға және экологиялық тұрғыдан тұрақты шешімдер әзірлеуге қабілетті мамандарды даярлауға баса назар аударады.
Біздің оқытушылар құрамының, студенттердің және бағдарламалардың қысқаша көрінісі.
Біз Қазақстанның су саласындағы тұрақты болашағын қалыптастырып жатырмыз: су ресурстары саласындағы мемлекеттік бағдарламаларға ғылыми қолдау көрсете отырып, қолданбалы деңгейден бастап ғылыми элитаға дейінгі толық циклді мамандарды даярлаймыз. Университет білімді, технологияны және тәжірибені біріктіру арқылы құзыреттердің үзіліссіз дамуына және жаңа сын-қатерлерге тиімді әрекет етуге жағдай жасайды. «Ғылым — Саясат — Тәжірибе» өзара байланысын іске асыру арқылы біз ұлттық су қауіпсіздігі мен саланың тұрақты дамуына қосқан үлесімізді арттырамыз.
Университеттің мақсаты — су ресурстары саласындағы мемлекеттік бағдарламаларды ғылыми тұрғыда қамтамасыз ету және іске асыруға ғылыми қолдау көрсету, сондай-ақ кәсіби жоғары және жоғары оқу орнынан кейінгі білім берудің барлық деңгейлері бойынша кадрлар даярлау.
Білім беру қызметі Университет Жарғысы мен 2025 жылғы 16 қаңтарда берілген № KZ42LAA00036887 лицензиясы және оған қосымшалар негізінде жүзеге асырылады. Лицензия Қазақстан Республикасы Ғылым және жоғары білім министрлігінің Ғылым және жоғары білім сапасын қамтамасыз ету комитеті атты республикалық мемлекеттік мекеме тарапынан берілген.
